Met jou klere aan

Skooltyd moes ons 'n internskap doen.
Vir 'n week was ek by Protea Boekhuis in Hatfield. In die oggende het ek met die bus stad toe gery, my Discman in my sak en die CD van die dag gereed vir die uur wat ons deur Pretoria sou ry. By die werk het ek nie juis veel gedoen nie. Ek het in 'n hoekie gesit en manuskripte gelees, meer kan ek nie onthou nie.

Een van die vrouens wat daar gewerk het het dié sin teen haar muur vasgeplak, en ek sal dit nooit vergeet nie: vir julle skryf ek susters, wat in die liefde geval het, wat gebreek het soos borde.

Nou, meer as 10 jaar later, kry ek die hele gedig van Sarina Dönges aanlyn:

My arme susters

vir julle skryf ek, susters,

wat in die liefde geval het

wat gebreek het soos borde

of dunner, soos Venesiese glas

julle wat die snykant

van nagdinge ken

aan julle deure sal kom klop

die woordgeleerdes en fariseërs

uitgeswel soos somervrugte, immuun

teen die steekvlieë van die sonde.

julle wat gesmul het

aan gesteelde pere

sal snags in Mosesmandjies lê

op 'n meer van Valiums

die lakens sal julle vasrank

soos plante 'n vermoeide huis.

julle wie se minnaars wortelskiet

langs hulle geil vrouens,

julle sal opeens weet, liewe susters,

(julle lywe uitgeskud soos meelsakke)

dat julle bloot 'n bestanddeel was

nooit met liefde gesuurdeeg nie;

julle was peuselkos

aptytwekkers voor 'n maaltyd

ag, my arme susters.